Bata, bestea ta txakurraren hestea

Neure hirugarren hamarkadaren buztan-buztanean, maiatzak 26, izan naiz lehenengo bider Bilboko Azkena aretoan. Marah taldea zen bertan entzungai eta, aspaldiko partez, oso-osoan bete nauen ekitaldia ikusi dut. Ez daukat buruan sasoi hauetan elektrizitateari maila honetan ekiten dion beste talderik, munduak gau horretan bertan amaitu behar balu bezala eman ahalean, ekin eta ekin!!! Kanta zatia kanta zatiaren hurrengo, eten barik… Springsteen, Dylan, Replacements, Wilco eta The Faces irabiagailuan sartu eta fresko-fresko edan. Rock´n´roll amerikarraren biziraupenaren esperantzetako bat, inondik ere.

Bizia, hurrekoa, izerditsua, indartsua, zirraragarria, kixkalgarria… Bielanko anaiak buru dituen Philadelphiako boskotearen saioa.
Ez naiz adjektibo arranditsuen zale baina lotsa barik luzatuko nuke katea, lagun bati kontzertu hau ikusteko arrazoi parea eskatutakoan, badaezpadakotzat hartutako adjektibo handiari jarraiki: “…tienen un directo demoledor…”

Arrazoia zuen Enrikek. Birringarri eta soseguaren etsai jardun zuen Marah-k ordu eta erdi luzean. Gaurko gorputz berrogeikari birrindua lekuko.

Powered by Castpost

Carlos IIIa errege atzerritarraren biloba izan zen Isabel IIak, «lengua» ordez «dialecto» erabiliz, 1860ko Erret Aginduan: Que en las capitales y poblaciones donde se conserve todavía (sic) el uso de algunos dialectos, se reduzcan todos los nombres a la lengua castellana.

PC Today 2006 nº 145 (49.or.) (Tu revista de informática e internet)

El País Vasco ya dispone de una base de datos para recoger los términos de esta dialecto, lengua oficial en dicha región, que recibe el nombre de Ereduzko prosa gaur.

Ez dut sekula ezagutu dentistarenera lasai eta poltsikoari eragingo zaion zartadaren beldur barik joaten denik. Onartuta daukagu tokatzen zaigunean tokatu zaigula eta geure horzdura gaixoengatik, lantzean behin, derrigorrezko zerga ordaindu behar dugula. Dentistarenera jotzea, ezer baino lehen, lapurreta eta nabarmenkeria izango da, ez dago besterik. Hortik aurrera etzan gaitezen tortura butaka horretan, eskuak elkarri indarrez lotu eta “zeurea naiz, egin iezadazu nahi duzuna” esan geure bostean. Txxxrrrriiiiiii, friiiizzz-friiiiizzz, kri-kri-kri… eutsi gogor hortxe!!!

Ahoan basokada urari eragin behin eta berriro, txu eta txu, lasaitu ederra hartu berriro ere hanken gainean jarritakoan eta geure aho miatzaileari agur esaten diogu irribarrez, artean ezpain-matrailak mortziloi eta koskabilloak eztarrian ditugula.

Sarreran geure zorrak kitatu eta pagatutakoa pagatuta, nor ausartuko zaigu haginak geureak ditugun galdetzera? Izango ez dira, ba, geureak!!!

Hildakoaren gau beilan honela ei ziotson lagunminetako batek beste bati:

-Patxi, ez gara ezer…

Eta ahobeteka jaten ari zirenek albotik:

-Ezta geu ere, baina pintxoak ematen dituzte hemen eta…

Honelaxe sentitu ginen geu ere, blogen kontu honetan sei hilabete eskas daramatzagun hauek, Miramar jauregi dotorean izandako ihardunaldietan hizlari aritu ginenean… Bide urratzaile izan ei gara ikasle bakoitzari euskara - gaztelera - ingeles hizkuntzak lantzeko blog bana zabaltzean eta…

Bide berriak ireki beharra dago, bai, irakaskuntzan bizirik iraun nahi bada, gaur eguneko ikasleen ohitura berrietara egokitu beharra, nolabait.

Gure lorpenik handiena, eta ez da gutxi, irakasle grisaren egunero-eguneroko zeregin betiberdinetik irten eta hiru lankide norabide bakarrean jartzea izan da. Bagara ala ez gara?