Apirilaren hasieran, maisu Juleni agindutako moduan, egun erdiko lanaldia berreskuratu arren, irakasle jendeak merezitako hamabostaldia izan dugu opor eta, aurreko txatalak balbea ekarri izan bailidan, hor gelditu naiz ez atzera ez aurrera, blogosferan not to be aukeratu izan banu bezala.
Blogger bizarguri honen ajeak, inondik ere, arian-arian saneatuko direlakoan, trankil lo egin.
Etorri omen datorrenari
datorren bezala etortzen utzi,
ala etorri behar lukeena
datorren ahalegindu.
Horra hor arazoa.
Aforismoa ez da nirea, Joxerra Gartziari mailegu hartua da. Izan garelako, bagarelako eta izango garelako, ETAren su-etenaren ostean, herri hau norabide egokian jartzen jakin beharko dugu egunez egunekoan. Izango bagara.
BIZKARZABAL izen bati adjektiboa gehituz adjektibo berritzat hartuko genukeen hitz hau ulergarria eta, areago, erraz irudikatzeko modukoa dugu: 4X4 piuradun gizasemea, luze bezain zabal, gorputzeko giharretako bakoitza klenbuterolez puztutakoa eta asteko egunetako bakoitzean, ahal dela, gimnasioko ispiluen aurrean bere gorputza miresgai duena, esaterako.
BIZKARZAIN Euskal Herrian, aitatutako bizkarzabaletako asko, gimnasio monitore eta diskoteka atezain darraitenak kenduta, ETAren mehatxupean bizi izan diren politikarien geriza izan dira luzaroan, inoiz ezbeharren bat gerta zekiekeen beldurrez bizi izan diren politiko kikilduen bizkarren jagole.
BIZKARROI Inoren lepotik bizi denari zaio adjektibo hau. Asko eta asko dira estatu espainiar osoan, orain arteko enplegua ETA erakunde armatuari zor diotenak. Esandakoaren adibide xume, oinezko arruntok mister izangai edota lepazain zabalokin batzen garen gimnasioetako batean ahapeka entzundakoa:
- Ilun jarriko zaigu orain lan panorama…
Zeuek atera kontuak…
Agindua zor izaten ei da eta aurreko txatalaren haritik, Anariren ekitaldiaz jardungo dut. Itzela. Lehenengo aldiz izan nuen Anari aurrez aurre eta harritu egin ninduen aro berriko beste euskal artista batzuek ez bezala, emakume honek erakarritako jende oldeak. Antzokia bete lagun. Inguruan izan nituen puristenek ez bezala ikaragarri gozatu nuen kantaldiaren elektrikotasunarekin. Barkatuko dizkidazue konparazioak, baina Petti handiaren arima biki femeninoa ezagutu nuen nik, tarteka, Patxok lar iritzi zion banda lagun, atmosfera elektriko Neil Youngdarrak sortuz. Orain zurru-zurruka, orain ahots zartatuz eztarria urratu arte eman ahalean, beti ere hitzak tatarrez; orain deabruzko tramankuluari eskuez ateratako txistu hotsa miresgai , orain aroztegiko zerra arruntari ateratako tarratotsa lagun. Soinu indartsua, ekina erritmoan, sarkorra eta etenik bakoa, motozerra hotsa bezain temati , motoze(b)rra.
Get free blog up and running in minutes with Blogsome
Theme designed by Hadley Wickham
